CASPİ1.NET – 5!
Soron rə-rə qardedən, jıqo bızın çə ruji səpe 5 sor dəvardə ni, jıqo bızın zinəbe Caspi1.net sayt iyən Caspi1TV bə tolışon xidmət beşe ruj. Bə vaxti çəmə elektron informasiya kanalon kambin, çəvonədəən kali qılon “dalay-dalay” əjənin, əvon hejo ımrujən ıştə “dalay-dalay”ədən, nə bə vaxti zıne nəbi ım kanal çı tolışiye, ya çı tolışi ni, nəən ısət.
Ha, iyo çı tolışon qıləy zərb məsəl bə yod dəşedə – zəmonə həminə zəmonə nıboən, Xıdo həminə Xıdoye, yəne ki, zəmonə 5 sor bənavi zəmonə nıboən Caspi1.net iyən Caspi1TV həminə Caspiye – çı tolışon, tolışəti xidmətədə mandə Caspi…
Aradə mıkuən parsedən: Boçi Caspi? Boçi co nom – bə tolışi, tolışəti ayd nom noəşon ni bə sayti, bə TV? Cəvobım hejo kırt bə – tolışi, tolışəti simvolonədə qıləyən Caspiye, rəhmətşə Əli Nasir çoknə əvoti? “Azim Caspi, azim Kadus, azim Qel”, bəle, Caspi hejo əmənimon, əmə hejo Caspimon.
5 sore çəmə ğıyətinə bıyə Ruslan Əlmoszodə çı Caspi1.net sayti iyən Caspi1TV şələ ıştə amonsə kırnedə, ım şələ qonə şələye, har peşt bı qonyəti tov varde əzıni, har peşt ənnə zori işkili qonyəti jiədə dik, şux mande əzıni, əmmo Ruslan bı işkilon tov vardedə, 5 sore ım qonə şələ kırnedə, kırnedə ki, tolışon çı dınyo koonku xəbədo bıbun, tolışon dınyo koonku bə kəno nımandon…
5 sor! Yolə rəğəm nıbuən, qədə rəğəmən ni. Isət 5 sor bə nav çıçon bən, çiçon bənin və ya ımruj çiçon bedən, çiçon hestin – ımoni vote veyən çətin ni, əmmo kali çiyon hesten ki, əvoni har odəm, har sayt vote zınedəni. Vote zınedənin, tarsedən, ıştə tarsiyən niyon kardero “çə fılon ko həxədə nıvışte çı mənaş heste?” vonə vardedən. Votedəş ki, biləma, ço hiç mənaş ni? Oxo ıştı tolışə fərzəndi qətedən, bəy zulm doydən, kuyedən, bəçəy qıy dezzu narkotiki savdoqirəti noydən, tınən bı həxədə i kəlməən bıbu nıvıştedəniş, votedəniş, ıştı sayti bə tolışi, tolışəti çı dəxlış heste?…
Tolışəti – ım qıləy tarixe, bə hisob ımrujnə rujiku qəp jəy-jəy, nıvışte-nıvışte bə dəvardə rujonən nəzə səğande lozime, ıştə kardə səhvon, xəton omute lozime, əvoni sərost karde lozime, kırt – ıştə səpe ko karde lozime, çoknə ki, çəmə Caspi1.net iyən Caspi1TV ıştə səpe ko karde-karde bə professional dərəcə rəsə…
Arada vindedəş kali tolışon zıne-zıne, kali tolışon nıznəyku parsedən ki, “Caspi çiki kanale? Caspi çiki proyekte?” Bəvon doə cəvobi iyoən nıvıştedəm – Caspi çı Ruslan Əlmoszodə proyekte, çəy rəhbərən əve, sıvoy Ruslani hiç ki vote əzıni ki, əçəy bə Caspi proyekti i cınqırən bıbu anqılətiş heste…
Təbrik kardedəm Caspi1.net, təbrik kardedəm Caspi1TV, təbrik kardedəm tolışi ğıyətmandə zoə Ruslan Əlmoszodə, mubarəke!
Rafiq Cəlilov
“Tolışon Sədo” rujnomə sərredaktor.
